Visita a Termatalia e roteiro polo sendeiro periurbano.

avatar Escrito por salourense98
10 de octubre de 2019 a las 10:02h

O 20 de setembro o alumnado de 4º de Ensino Primario estivo de visita en Termatalia, onde aprenderon sobre o uso terapéutico e ecolóxico da auga.

Foi unha experiencia moi relaxante para comezar o curso do xeito máis positivo.

Unha semana máis tarde, o 27 de setembro, o alumnado de 5º de Ensino Infantil levou a cabo o percorrido ponte vella-desembocadura do Loña-Oira-ponte vella.

De volta ó cole houbo tempo para recoller landras para a sementeira no invernadeiro, e tamén para xogar.

Semana da mobilidade.

avatar Escrito por salourense98
10 de octubre de 2019 a las 9:44h

Os días 16 e 18 de setembro alumnado de 6º de Ensino Infantil e de 6º de Ensino Primario participou nas actividades programadas na semana da mobilidade.

O alumnado de 6º de Ensino Infantil levou a cabo un roteiro pola cidade que rematou cunha representación teatral.

O alumnado de 6º de Ensino Primario participou nas actividades organizadas pola Confederación Galega de Persoas Con Discapacidade (Cogami) no entorno do Parque de San Lázaro.

Tiveron tempo tamén para atender ós medios de comunicación.

Podedes ver os programas emitidos por Telemiño nos seguintes enlaces:

https://www.youtube.com/watch?v=oysKpaQCyzI

https://www.youtube.com/watch?v=_WV1bDAcgCI

DE VOLTA, COMO EN CASA.

avatar Escrito por salourense98
10 de octubre de 2019 a las 9:16h

Saúdos e benvidos ó noso blog. Aquí estamos, con novas actividades. Comezamos !!!

VISITA A HENGISTBURY HEAD.

A primeira semana do curso un grupo de alumnas e alumnos de 2º, 3º e 4º de ESO, acompañados por Cristina López, participou no Programa de Inmersión Lingúística do noso centro na localidade de Southbourne, na costa sur do Reino Unido. Entre as actividades que se levaron a cabo destaca a visita do 17 de setembro á reserva natural de Hengistbury Head.

Esta reserva natural atópase preto de Bournemouth, e conta cunhas fermosas vistas sobre a Illa de Wight e Christchurch.

No itinerario por este espazo natural o alumnado tivo a oportunidade de coñecer de cerca o ecosistema da marisma…

… a flora e a fauna…

… e os aspectos orográficos máis destacados da costa e dos cantís, como a composición e formación dos distintos niveis do solo ao longo do tempo.

Unha interesantísima experiencia moi ben integrada na aprendizaxe do inglés na outra beira da Canle da Mancha.

PREMIOS VOZ NATURA

avatar Escrito por salourense98
15 de junio de 2019 a las 19:57h

O 14 de xuño visitamos as instalacións de La Voz de Galicia en Arteixo para recoller o premio Galicia e o premio ó mellor blog da comunidade Voz Natura. O premio Galicia, dotado con 5.000 euros, conta co patrocinio da Consellería de Medio Ambiente; o premio ó mellor blog da comunidade Voz Natura (un iPad) está patrocinado por Coca-Cola.

A expedición, integrada por 16 alumnas e alumnos de 3º e 4º de Ensino Secundario, e catro alumnas e alumnos de 1º de Bacharelato, acompañados por tres docentes, representou ó centro no acto que se levou a cabo no Museo Santiago Rey Fernández-Latorre.

Nun ambiente distendido, os galardóns foron entregados ó alumnado de todos os centros premiados, acompañado polos seus educadores en todo momento. No noso caso, Alicia, Enrique e Marta foron os encargados de recoller o premio ó mellor blog da comunidade Voz Natura.

Máis tarde, Sara, Fabio e Quique recolleron o premio Galicia.

Logo da entrega de premios, os responsables do acto repartiron ós asistentes en distintos grupos para levar a cabo unha visita guiada polas instalacións de La Voz de Galicia. O noso grupo, guiado por Nazareth Díaz Castro, percorreu as instalacións na compaña dos representantes do Centro de Educación Especial Terra de Ferrol, gañadores do premio ó mellor vídeo do concurso de vídeos medioambientales de Voz Natura, ¡Así se cuida la naturaleza!

Tivemos ocasión de visitar a planta da redacción e observar de preto o traballo dos xornalistas e a xestión das novas en tempo real…

… atender as detalladas explicacións de Nazareth na zona de deseño e impresión…

… sorprendernos cunha manchea de curiosidades sobre as bobinas de papel e as rotativas…

… e desfrutar dun aperitivo e facernos unha foto coa mascota do evento antes de abandonar as instalacións.

Pola tarde, de volta a Ourense, desviámonos en Bandeira para visitar os miradoiros da fervenza do Toxa, afluente do Deza.

Foi unha xornada de convivencia moi completa, a guinda da nosa participación durante este curso no Programa de Educación Ambiental Voz Natura.

 

VII Roteiro didáctico ambiental polo Concello de Parada de Sil

avatar Escrito por salourense98
24 de mayo de 2019 a las 18:03h

O día 13 de maio boa parte do alumnado de 3º ESO, acompañados por María Molina, Iván e Quique (docentes de Xeografía e Historia, Tecnoloxía, Bioloxía e Xeoloxía e EPVA), levou a cabo un roteiro didáctico ambiental polo concello de Parada de Sil. Os Seminarios de Ciencias Experimentais, Tecnoloxía e E.P.V.A. levan organizando esta actividade desde o ano 2012, e salvo na edición do 2016, o alumnado deste curso de ensino secundario obrigatorio tivo sempre a oportunidade de participar nesta xornada que combina á perfección natureza e patrimonio, axudando a descubrir os valores ambientais e culturais desta zona da provincia de Ourense.

A primeira parada, logo de algo máis dunha hora no transporte, foi na Fábrica da Luz, unha antiga instalación para a producción de enerxía eléctrica situada preto do límite dos concellos de Parada e A Teixeira. Por ese límite discurre o río Mao, labrando un portentoso canón fluvial, aproveitado polo concello para deseñar un sendeiro (o PR-G 177) e construir unha pasarela peonil de madeira desde a que se pode desfrutar dun entorno espectacular.

O alumnado estivo atento a información sobre a flora e a fauna dispoñible por todo o percorrido, presentada en paneis divulgativos didácticos ben integrados na contorna.

Ó chegar a Barxacova, moi preto da desembocadura do Mao no Sil, voltamos pola mesma pasarela, e unha vez nos buses trasladámonos a Parada de Sil, para continuar coas visitas.

No acceso ó miradoiro de Torgás (tamén coñecido como Balcóns de Madrid) paramos para ver o Pozo do Lobo, unha construcción doutra época que, xunto cos foxos do lobo, se empregaba para dar caza a estes animais antes da aparición das armas de lume.

A continuación achegámonos o miradoiro, no límite provincial, con vistas ó impoñente canón do Sil e á beira lucense do concello de Sober.

Antes do xantar, percorrimos un pequeno treito do sendeiro que, entre castiñeiros, Castanea sativa, e carballos, Quercus robur e Quercus pyrenaica, comunica o mirador coa vila de Parada.

Logo do xantar e do tempo de descanso dirixímonos ó Museo do Chocolate de Teimende, onde puidemos descubrir o traballo da familia Casares entre os anos 30 e os anos 80 do pasado século.

Máis tarde, visitamos o Mosteiro de Santa Cristina de Ribas do Sil, un dos enclaves singulares da Ribeira Sacra.

De volta a Parada, vistas e fotos no miradoiro de Castro antes de voltar a Ourense.

Este roteiro forma parte dun ciclo programado polo centro co obxectivo de que o alumnado de ESO e Bacharelato teña a oportunidade de descubrir os valores ambientais e patrimoniais da contorna. As visitas están distribuídas do seguinte xeito:

– 1º ESO Sendeiro Periurbano de Ourense – 1 xornada.
– 2º ESO Bosque de Ridimoas – 1 xornada.
– 3º ESO Parada de Sil – 1 xornada.
– 4º ESO Macizo Central Ourensán – 1 xornada.
– 1º BAC Parque Natural Invernadeiro – 4 xornadas.
– 2º BAC Asturias-León – 3 xornadas.

Con esta actividade poñemos fin as saídas programadas para o curso 2018-2019 polo Seminario de Ciencias Experimentais, en colaboración con outros Seminarios do centro e dentro do Programa de Educación Ambiental VOZ NATURA.

Maqueta topográfica con alumnado de 4º ESO.

avatar Escrito por salourense98
12 de mayo de 2019 a las 17:08h

O alumnado de Cultura Científica de 1º de Bacharelato do curso 2017-2018 deixou rematadas varias pezas da nosa maqueta topográfica, elaborada con cartón a partir de mapas con escala 1:10.000. Outras ficaron o curso sen darlle término, ocasión aproveitada polo alumnado de Bioloxía e Xeoloxía de 4º de ESO deste ano para traballar nas aulas durante este último trimestre.

Nos mapas topográficos un elemento do relevo, como unha montaña por exemplo, se ve cortada por hipotéticos planos paralelos, e represéntase sobre un plano a proxección das liñas de intersección entre os planos e o territorio. Esto da lugar a unha sucesión de curvas de nivel representadas na folla cartográfica correspondente. Se marcamos as curvas de nivel sobre láminas (no noso caso de cartón) e cortamos as liñas resultantes, superpoñendo cada lámina a outras anteriores, recuperamos o caracter tridimensional “agochado” cando se levou a cabo o mapa empregando a altimetría.

Este curso imos tentar rematar as pezas que se ven resaltadas no seguinte mapa. Para facer que a maqueta teña certa proxección vertical, e dado que empregamos láminas de cartón de 2 mm de grosor, estamos a cortar todas as curvas de nivel, de xeito que a escala horizontal será 1:10.000 e a vertical 1:5.000.

O alumnado organizouse nos seguintes grupos de traballo, de xeito que cada grupo “comparte” peza da maqueta con compañeiras/os do outro grupo/aula.

Presentación nas aulas de 4º A e 4ºB, o día 29 de abril, dos contidos e do traballo levado a cabo nos cursos anteriores.

Traballo na aula de 4ºA o 2 de maio.

Traballo na aula de 4ºB o 8 de maio.

No caso de rematar as pezas asignadas, quedarán dúas (A1 e B1) para completar este puzzle topográfico que representa ó concello de Ourense e parte dos concellos limítrofes.

Roteiro Didáctico Ambiental de 4º ESO polo Sendeiro Periurbano de Ourense.

avatar Escrito por salourense98
2 de mayo de 2019 a las 20:09h

O Seminario de Ciencias Experimentais do centro, en colaboración co Seminario de Xeografía e Historia, o Seminario de Tecnoloxía e o Seminario de Educación Plástica e Visual, programa a comezo de cada curso unha serie de itinerarios de interpretación adaptados ós distintos niveis de Ensino Secundario. Nesta ocasión, 38 alumnas e alumnos de Bioloxía e Xeoloxía de 4º de ESO, acompañados por tres educadores, percorremos o escape noreste do sendeiro periurbano de Ourense en sentido antihorario, tal como indican as frechas vermellas no seguinte mapa.

O percorrido comezou cedo, ás 08:30 h do martes 30 de abril, ó carón da Ponte Vella, momento no que comentamos sobre a cartelería do sendeiro a proposta para ese día.

Logo de atravesar o casco urbano da cidade, ascendimos por San Francisco para facer unha parada a media subida e contemplar a panorámica da cidade. Os docentes do seminario de Ciencias Experimentais facilitaron ó alumnado unha unidade didáctica con propostas de actividades, repartidas polo percorrido.

Arredor das 10 h chegamos ó Parque Botánico de Montealegre, ó que accedimos polas escaleiras instaladas á beira do descargador da antiga canteira, un exemplo de recuperación de patrimonio industrial.

Corbal (coordinador das tarefas de mantemento do Parque Botánico de Montealegre) deunos a benvida e explicounos como é o día a día deste espazo, próximo ó centro histórico da cidade e descoñecido para boa parte da poboación.

No invernadeiro visitamos á exposición de plantas carnívoras…

… e continuamos a visita ó parque achegándonos ó miradoiro da cruz, facendo unha parada previa para que Corbal nos explicara a importancia da fauna no desenvolvemento do parque.

Tamén nos comentou unha manchea de curiosidades sobre moitas especies exóticas presentes no parque, así como características das especies autóctonas.

Pasamos polo miradoiro do Cuco…

… antes de plantar as frondosas do miniviveiro de 1º de ESO (ver entrada do 1 de decembro de 2018), que os docentes prepararan e trasladaran ó parque o día anterior.

Os operarios do Concello de Ourense, que xestiona toda a instalación, axudáronnos coas ferramentas e indicáronnos como plantar as árbores.

Ó remate, xeolocalizamos nos mapas as ubicacións das árbores plantadas, como parte da actividade proposta polos docentes para levar a cabo no parque.

Sobre as 12 h continuamos a marcha cara Ceboliño.

Logo de xantar e descansar da subida da mañá, comezamos o descenso ó Loña, rodeando a minicentral e o encoro de Castadón…

… camiñando por bosques propios doutras latitudes…

… para chegar ó Castro de Santomé.

Durante todo o percorrido os docentes foron comentando cuestións relacionadas co itinerario, como a abundancia de mimosas, Acacia dealbata, plantas exóticas invasoras; a xeomorfoloxía da comarca de Ourense, que se aprecia moi ben desde os miradoiros; os carrabouxos dos carballos, causados por vespiñas da familia Cynipidae; as diferenzas nas follas dos carballos, Quercus robur, e os cerquiños, Quercus pyrenaica; como a codia (corcho) das sobreiras, Quercus suber, tiña protexido ás árbores dos lumes; a presenza de especies propias da rexión mediterránea, como o érvedo, Arbutus unedo

Logo de descender polo Camiño Real continuamos polo sendeiro do Loña, atentos á posibilidade de avistar algún animal propio do ecosistema de ribeira, como as lontras, Lutra lutra, garzas, Ardea cinerea, alavancos, Anas platyrhynchos, martiño pescador, Alcedo atthis, odonatos, troitas…

O roteiro rematou preto das 17:15 h, e será unha das últimas actividades que o alumnado de 4º ESO incorporemos ós vídeos que estamos a preparar para presentar ó concurso do Programa de Educación Ambiental VOZ NATURA.

Visita á E.D.A.R. de Ourense co alumnado de 1º Bacharelato de Cultura Científica.

avatar Escrito por salourense98
1 de mayo de 2019 a las 19:23h

A tarde do luns 29 de abril, o alumnado de Cultura Científica de 1º de Bacharelato, acompañado polos docentes desta asignatura, tivo a oportunidade de visitar as instalacións da Estación Depuradora de Augas Residuais (E.D.A.R.) de Ourense, desprazándose ata a mesma en bus urbano e voltando ó centro no mesmo medio de transporte.

A visita formaba parte das actividades propostas por VIAQUA-Servizo Municipal de Augas para facilitar o acceso da cidadanía a esta infraestrutura, co obxectivo de concienciar á poboación sobre o consumo responsable da auga e as particulariedades da xestión sostible da mesma.

O itinerario didáctico comezou visitando o edificio de control.

Logo da proxección dun audiovisual, que explicaba o funcionamento da instalación, José Ángel, supervisor da mesma, explicounos o funcionamento das distintas partes da infraestrutura.

Ó rematar a explicación, levounos ó edificio de pretratamento, onde observamos de preto como se recepciona a auga que chega directamente da rede de saneamento da cidade.

Posteriormente, pasamos á zona de decantación lamelar…

… e á de tratamento terciario.

Para rematar a visita, pasamos polo edificio de proceso de fangos, dixestores e grupos de xestión da enerxía.

A visita durou unha hora e media, entre as 16:15 e as 17:45 h. A actividade foi organizada polos docentes do Seminario de Ciencias Experimentais en colaboración con VIAQUA-Servizo Municipal de Augas de Ourense, á que lle agradecemos poder visitar esta moderna instalación, na que está a innovar na xestión da auga incorporando procesos de última xeración.

Exposición en préstamo do CEIDA (Rede Natura 2000 en Galicia) e traballos en Google Maps.

avatar Escrito por salourense98
27 de abril de 2019 a las 16:32h

Desde as datas previas á entrada do 31 de marzo deste blog moitos cursos pasaron pola exposición. O 11 de abril o alumnado de 1ºA de Bacharelato colaborou na recollida da mesma, para poder levar a cabo a posterior devolución ó CEIDA.

A continuación presentamos unha escolma de imaxes do alumnado que, nesas datas, participou nesta interesante proposta divulgativa.

1ºB Ensino Primario (29 de marzo).

2º Bacharelato (01 de abril).

4ºB-C ESO (01 de abril).

1º Bacharelato (04 de abril).

1ºB ESO (04 de abril).

2ºA ESO (04 de abril).

1ºC ESO (05 de abril).

2ºB ESO (05 de abril).

2ºC ESO (05 de abril).

Por outra banda, o alumnado de 1º de ESO segue a traballar nas aplicacións de Google. En colaboración co Concello de Ourense están a elaborar materiais informativos vencellados a distintos puntos do sendeiro periurbano. Na seguinte ligazón web podedes consultar a información e apreciar este innovador traballo.

https://sites.google.com/view/toopsalesianos/eso/1

Roteiro Didáctico Ambiental de 2º ESO polo Bosque de Ridimoas

avatar Escrito por salourense98
15 de abril de 2019 a las 19:02h

Rematando o segundo trimestre, o xoves e o venres da pasada semana o alumnado das aulas de 2º C e B de ESO, acompañados polas titoras e outros educadores do noso centro, tivemos a oportunidade de percorrer o Bosque de Ridimoas, en Beade, guiados por Paula e Pablo (coñecido por todos como Oitabén).

Citámonos con Paula e Oitabén na eirexa parroquial de Santa María de Beade (antiga Encomenda da Orde Militar dos Hospitalarios de San Xoán de Xerusalén, máis tarde coñecida como Orde de Malta; prestade atención ó cruceiro da seguinte imaxe, na parte superior esquerda da mesma), onde comezamos a usar a unidade didáctica proporcionada pola Asociación Ridimoas, documento de referencia durante toda a xornada para ir descubrindo curiosidades do entorno e aprender unha manchea de cousas sobre este espazo. A actividade desta asociación naturalista, radicada en Beade, céntrase na recuperación de hábitats para especies autóctonas no bosque, de máis de 400 hectáreas, que posúe neste municipio de O Ribeiro.

A beira da capela de San Roque fixemos unha parada para comentar os cruceiros do calvario, do século XVIII. A súa silueta é moi popular grazas o debuxo levado a cabo por Castelao na súa obra “As cruces de pedra na Galiza” (libro publicado póstumamente pola editorial Nós na imprenta López de Buenos Aires en xaneiro de 1950), un detallado estudio no que describía a historia, significado e tipoloxía dos cruceiros galegos.

Aínda entre a néboa ascendimos para adentrarnos no Bosque de Ridimoas, seguindo a “Ruta dos Arrieiros”. Este camiño foi durante séculos a principal vía de comunicación entre Ribadavia e Pontevedra; desde o século XV empregouse para transportar viño e outras mercadurías; parte dese viño quedaba nos lugares e parroquias da comarca, e parte era posteriormente comercializado no País Vasco e na Bretaña Francesa; no século XVII o viño “ribeiro” era embarcado en Pontevedra con destino a Santander, País Vasco e Asturias, así como America e algúns países europeos.

Ó pouco de entrar no bosque, Paula falounos das mimosas, Acacia dealbata, e do tremendo impacto que teñen na comarca de O Ribeiro estas leguminosas, consideradas prantas exóticas invasoras. Nas zonas fortemente invadidas non medra outra especie vexetal debido á gran densidade das mimosas que non deixan nin espazo nin luz a outras prantas; alteran a cantidade e calidade de follasca, o contido en nutrintes, as características físicas e as comunidades microbianas dos solos invadidos…

… se ben Oitabén chamou a nosa atención sobre unha característica positiva destas prantas: son quen de enriquecer ó solo, dado que se asocian con bacterias do xénero Rhizobium (fixadoras do nitróxeno atmosférico) nos nódulos que se forman nas súas raíces. Grazas a estes nódulos, que se poden ver na seguinte fotografía, as prantas obteñen nutrintes esenciais. Pero as bacterias que se asocian ás raíces poden ser exóticas tamén e, nese caso, afectar negativamente a leguminosas nativas como a xesta, Cytisus sp, e o toxo, Ulex europaeus.

Onde remata o primeiro treito do camiño, recuperado pola Asociación Ridimoas, e logo dunha intensa limpeza para eliminar as mimosas, no solo apareceron as prantas que vedes a continuación, unha herba de nome leiburiña, Agrostis truncatula, unha pranta herbácea anual da familia Poaceae (gramíneas), que presenta as lígulas dentadas, as flores en inflorescencia en panícula moi ramuda e con glumas membranosas.

Oitabén tamén falou das especies arbustivas e arbóreas autóctonas, como a pereira brava, Pyrus cordata, insistindo moito na importancia de identificar e coñecer as especies para poder respetalas, coidalas e protexelas.

A media mañá visitamos a mina de auga das píntegas, Salamandra salamandra gallaica. Oitabén describiu o ciclo vital destes anfibios e amosounos individuos en estado xuvenil e semiadulto, lembrándonos que son animais moi delicados e que corren serio perigo.

Na mesma zona amosounos as flores femininas e masculinas dos carballos, Quercus robur, inflorescencias que aparecen entre abril e xuño, en característicos pedúnculos colgantes.

Nas proximidades puidemos ver o rastro dos corzos, Capreolus capreolus, que mordisquean as codias tenras dos piñeiros máis novos, como se aprecia na seguinte imaxe, na parte inferior dereita.

Outra das especies sobre as que chamou a atención foi o érvedo, Arbutus unedo (o madroño de Madrid, da familia Ericaceae), explicándonos como a comarca de O Ribeiro está baixo influencia do clima mediterráneo.

Logo falounos do gaio común (en castelán, arrendajo), Garrulus glandarius, un córvido de mediano tamaño e hábitos netamente forestais, que se alimenta tanto de invertebrados como de froitos e sementes, convertíndose nun auténtico “facedor de bosques”…

… e do fungo negro, Hormiscium ericae, un curioso ascomiceto que aparece na matogueira mediterránea dando a impresión de que os arbustos teñen sido pasto do lume; con aspecto de almofada negra, no Bosque de Ridimoas aparece sobre a codia da uz branca, Erica arborea.

Para rematar, Paula e Oitabén propuxéronnos un xogo no que tivemos que facer memoria sobre as cousas aprendidas. Deste xeito rematou a visita, que durou algo máis de 3 horas.

Queremos agradecer á Asociación Ridimoas, e especialmente a Paula e Pablo (Oitabén) pola súa compaña e as súas inestimables aportacións, a oportunidade que nos brindaron de visitar e coñecer este espazo tan singular.

ojd